ba-zahir rang KHushbu raushni yak-jaan hote hain

ba-zāhir rañg ḳhushbū raushnī yak-jān hote haiñ

magar ye shahr andar se bahut vīrān hote haiñ

koī maane na maane guftugū kartī hai ḳhāmoshī

pas-e-dīvār-e-hasrat bhī ka.ī tūfān hote haiñ

ulajh jaa.eñ to suljhāne ko ye umreñ bhī nā-kāfī

ta.āruf ke agarche silsile āsān hote haiñ

sarāboñ kī ḳhabar rakhnā gharoñ ko chhoḌne vaalo

ka.ī ik be-dar-o-dīvār bhī zindān hote haiñ

yahāñ saarī kī saarī raunaqeñ reg-e-ravāñ se haiñ

bagūle hī to registān kī pahchān hote haiñ

palaT aane kā rasta aur hī koī banātā hai

musāfir sab ke sab anjām se anjān hote haiñ

to phir āñkhoñ meñ sapne ek se kyūñkar nahīñ ugte

lakīroñ ke agar donoñ taraf insān hote haiñ

safar to chalte rahne kī lagan se shart hai 'azmī'

jinheñ chalnā bahut ho be-sar-o-sāmān hote haiñ

ba-zahir rang KHushbu raushni yak-jaan hote hain

magar ye shahr andar se bahut viran hote hain

koi mane na mane guftugu karti hai KHamoshi

pas-e-diwar-e-hasrat bhi kai tufan hote hain

ulajh jaen to suljhane ko ye umren bhi na-kafi

taaruf ke agarche silsile aasan hote hain

sarabon ki KHabar rakhna gharon ko chhoDne walo

kai ek be-dar-o-diwar bhi zindan hote hain

yahan sari ki sari raunaqen reg-e-rawan se hain

bagule hi to registan ki pahchan hote hain

palaT aane ka rasta aur hi koi banata hai

musafir sab ke sab anjam se anjaan hote hain

to phir aankhon mein sapne ek se kyunkar nahin ugte

lakiron ke agar donon taraf insan hote hain

safar to chalte rahne ki lagan se shart hai 'azmi'

jinhen chalna bahut ho be-sar-o-saman hote hain