ba-adab teri mahfil mein aate rahe sari rasmen wafa ki nibhate rahe

bā-adab terī mahfil meñ aate rahe saarī rasmeñ vafā kī nibhāte rahe

surḳh phūloñ se maqtal sajāte rahe yūñhī luTte rahe jaañ luTāte rahe

apne hāthoñ meñ apnī salībeñ liye jitnī mohlat milī terī ḳhātir jiye

ham to jānāñ sar-e-dār bhī lab siiye tujh ko dekhā kiye muskurāte rahe

bazm-gāhoñ meñ jitne tamāshā.ī the sab ke sab terī āñkhoñ ke shaidā.ī the

ham to nādān the ham to saudā.ī the razm-gāhoñ meñ āñkheñ bichhāte rahe

sab havāle sadāqat ke be-kār the ham ki mansūr the ham gunahgār the

jab bhī āñkheñ khulīñ ham sar-e-dār the zindagī bhar yūñhī jagmagāte rahe

daar kī pahlī sīḌhī pe rakh kar qadam mo'atabar ho ga.e ek lamhe meñ ham

ham nibhāte rahe vahshatoñ kā bharam zaḳhm chunte rahe giit gaate rahe

kisht-e-jāñ meñ jo bo.e the aañsū kabhī be-panah tāzgī un kī fasloñ meñ thī

ham pukārā kiye zindagī zindagī chashm-e-nam meñ diye jhilmilāte rahe

vo jo har ik zamāne meñ ma.atūb thā vo jo har ik zamāne meñ maslūb thā

us musāfir kā raqs-e-junūñ ḳhuub thā der tak log qisse sunāte rahe

ba-adab teri mahfil mein aate rahe sari rasmen wafa ki nibhate rahe

surKH phulon se maqtal sajate rahe yunhi luTte rahe jaan luTate rahe

apne hathon mein apni saliben liye jitni mohlat mili teri KHatir jiye

hum to jaanan sar-e-dar bhi lab siye tujh ko dekha kiye muskuraate rahe

bazm-gahon mein jitne tamashai the sab ke sab teri aankhon ke shaidai the

hum to nadan the hum to saudai the razm-gahon mein aankhen bichhate rahe

sab hawale sadaqat ke be-kar the hum ki mansur the hum gunahgar the

jab bhi aankhen khulin hum sar-e-dar the zindagi bhar yunhi jagmagate rahe

dar ki pahli siDhi pe rakh kar qadam mo'atabar ho gae ek lamhe mein hum

hum nibhate rahe wahshaton ka bharam zaKHm chunte rahe git gate rahe

kisht-e-jaan mein jo boe the aansu kabhi be-panah tazgi un ki faslon mein thi

hum pukara kiye zindagi zindagi chashm-e-nam mein diye jhilmilate rahe

wo jo har ek zamane mein matub tha wo jo har ek zamane mein maslub tha

us musafir ka raqs-e-junun KHub tha der tak log qisse sunate rahe