baad tere kya bataen aur kya chalta raha

baa'd tere kyā batā.eñ aur kyā chaltā rahā

zindagī-bhar zindagī kā mas.ala chaltā rahā

rāt-bhar baiThā rahā maiñ rū-ba-rū-e-māhtāb

aur us se tazkira bas aap kā chaltā rahā

ḳhvāb meñ aatī na thiiñ shahzādiyāñ un ke kabhī

muflisoñ ke ḳhvāb meñ bhī fāsla chaltā rahā

mārte haiñ bastiyoñ ke log patthar qais ko

yā'nī sahrā kā safar achchhā-bhalā chaltā rahā

lams ko tere kabhī maiñ bhuul hī paayā nahīñ

saath mere 'umr-bhar ik hādisa chaltā rahā

shāḳh-e-dil se jhaḌ chukī thī 'ishq kī har ik kalī

rishta apne darmiyāñ bas naam kā chaltā rahā

maiñ to bas taktā rahā un ke lab-o-ruḳhsār ko

un ke dil meñ ab ḳhudā jaane ki kyā chaltā rahā

'umr-bhar pinhāñ rahā qalb-o-jigar meñ terā ġham

'umr-bhar ḳhushiyoñ se merā fāsla chaltā rahā

is liye 'in'ām' manzil tak na jā paa.e qadam

ek saaya saath mere ḳhauf kā chaltā rahā

ba'd tere kya bataen aur kya chalta raha

zindagi-bhar zindagi ka masala chalta raha

raat-bhar baiTha raha main ru-ba-ru-e-mahtab

aur us se tazkira bas aap ka chalta raha

KHwab mein aati na thin shahzadiyan un ke kabhi

muflison ke KHwab mein bhi fasla chalta raha

marte hain bastiyon ke log patthar qais ko

ya'ni sahra ka safar achchha-bhala chalta raha

lams ko tere kabhi main bhul hi paya nahin

sath mere 'umr-bhar ek hadisa chalta raha

shaKH-e-dil se jhaD chuki thi 'ishq ki har ek kali

rishta apne darmiyan bas nam ka chalta raha

main to bas takta raha un ke lab-o-ruKHsar ko

un ke dil mein ab KHuda jaane ki kya chalta raha

'umr-bhar pinhan raha qalb-o-jigar mein tera gham

'umr-bhar KHushiyon se mera fasla chalta raha

is liye 'in'am' manzil tak na ja pae qadam

ek saya sath mere KHauf ka chalta raha