ba-hama yurish-e-alam-o-sitam zinda hun main

bā-hama yūrish-e-ālām-o-sitam zinda huuñ maiñ

mus.haf-e-vaqt kā ik bāb-e-daraḳhshanda huuñ maiñ

mere siine meñ dhaḌaktā hai dil-e-asr-e-ravāñ

is zamāne kā mufassir huuñ numā.inda huuñ maiñ

maiñ ki haq thā huā har daur meñ maslūb magar

kal bhī pā.inda thā maiñ aaj bhī pā.inda huuñ maiñ

tū tamannā.ī hai ik jannat-e-mau.ūda kā

apnī gum kī huī firdaus kā joinda huuñ maiñ

mere zaḳhmoñ se huvaidā hai hinā-bandī-e-gul

ik naved-e-chaman-ārā.ī-e-ā.inda huuñ maiñ

mad.h-ḳhvān-e-shab-e-tārīk mujhe kyā samjhe

sub.h-e-gul-rez ke naġhmoñ kā navīsanda huuñ maiñ

ye jahāñ kaise farāmosh karegā mujh ko

is ke aflāk kā ik 'ḳhāvar'-e-tābinda huuñ maiñ

ba-hama yurish-e-alam-o-sitam zinda hun main

mushaf-e-waqt ka ek bab-e-daraKHshanda hun main

mere sine mein dhaDakta hai dil-e-asr-e-rawan

is zamane ka mufassir hun numainda hun main

main ki haq tha hua har daur mein maslub magar

kal bhi painda tha main aaj bhi painda hun main

tu tamannai hai ek jannat-e-mauuda ka

apni gum ki hui firdaus ka joinda hun main

mere zaKHmon se huwaida hai hina-bandi-e-gul

ek nawed-e-chaman-arai-e-ainda hun main

madh-KHwan-e-shab-e-tarik mujhe kya samjhe

subh-e-gul-rez ke naghmon ka nawisanda hun main

ye jahan kaise faramosh karega mujh ko

is ke aflak ka ek 'KHawar'-e-tabinda hun main