bab-e-tilism-e-hosh-ruba mil gaya mujhe

bāb-e-tilism-e-hosh-rubā mil gayā mujhe

maiñ ḳhud ko DhūñDtā thā ḳhudā mil gayā mujhe

jaanā ki reg-zār ke siine pe zaḳhm haiñ

saaya jo rāste meñ paḌā mil gayā mujhe

vīrāniyoñ se us ne mirā haal sun liyā

tanhā.iyoñ se us kā pata mil gayā mujhe

shohrat ke āsamān par uḌne lagā thā maiñ

raste meñ āgahī kā ḳhalā mil gayā mujhe

duniyā to mujh ko chhoḌ ke aage nikal ga.ī

ḳhvāboñ kā ik jazīra-numā mil gayā mujhe

gumrāhiyoñ pe faḳhr kī manzil ke paas hī

ik sañg-e-mīl hañstā huā mil gayā mujhe

jannat mire ḳhayāl kī mismār ho ga.ī

bad-qismatī se zehn-e-rasā mil gayā mujhe

bab-e-tilism-e-hosh-ruba mil gaya mujhe

main KHud ko DhunDta tha KHuda mil gaya mujhe

jaana ki reg-zar ke sine pe zaKHm hain

saya jo raste mein paDa mil gaya mujhe

viraniyon se us ne mera haal sun liya

tanhaiyon se us ka pata mil gaya mujhe

shohrat ke aasaman par uDne laga tha main

raste mein aagahi ka KHala mil gaya mujhe

duniya to mujh ko chhoD ke aage nikal gai

KHwabon ka ek jazira-numa mil gaya mujhe

gumrahiyon pe faKHr ki manzil ke pas hi

ek sang-e-mil hansta hua mil gaya mujhe

jannat mere KHayal ki mismar ho gai

bad-qismati se zehn-e-rasa mil gaya mujhe