baad muddat mile kuchh kaha na suna bhar gae zaKHm purwaiyan so gain

ba.ad muddat mile kuchh kahā na sunā bhar ga.e zaḳhm purvā.iyāñ so ga.iiñ

kañghī kartī huī reshmī zulf meñ merī betāb sī uñgliyāñ so ga.iiñ

aaj alhaḌ pujāran vo aa.ī nahīñ dil ke mandir meñ ghanTī bajā.ī nahīñ

aas ke sab diye TimTimāne lage mere jazbāt kī ghanTiyāñ so ga.iiñ

ab fazāoñ meñ ḳhushbū mahaktī nahīñ ab vo pāgal havā.eñ thiraktī nahīñ

ek to kar ga.ī kyā akelā mujhe lahlahātī huī vādiyāñ so ga.iiñ

us ke hāthoñ meñ chūḌī khanaktī nahīñ us ke pairoñ meñ paa.el jhanaktī nahīñ

chhoḌ dī maiñ ne jab se galī pyaar kī us ke kānoñ kī bhī bāliyāñ so ga.iiñ

ik nadī ke kināre base gaañv meñ guzrā bachpan mirā chāñd kī chhāñv meñ

ham baḌe jab hue ajnabī ho ga.e dil ke mandir kī sab deviyāñ so ga.iiñ

ghaaT dil kā mire aaj sunsān hai koī gopī nahāne ab aatī nahīñ

merī murlī kī dhun ab larazne lagī mere madhūban kī sab gopiyāñ so ga.iiñ

aam ke peḌ shādāb haiñ aaj bhī baurte aur phalte bhī haiñ vo magar

ab vo jhūle kahāñ ab vo kajrī kahāñ vo lachaktī huī Dāliyāñ so ga.iiñ

baad muddat mile kuchh kaha na suna bhar gae zaKHm purwaiyan so gain

kanghi karti hui reshmi zulf mein meri betab si ungliyan so gain

aaj alhaD pujaran wo aai nahin dil ke mandir mein ghanTi bajai nahin

aas ke sab diye TimTimane lage mere jazbaat ki ghanTiyan so gain

ab fazaon mein KHushbu mahakti nahin ab wo pagal hawaen thirakti nahin

ek to kar gai kya akela mujhe lahlahati hui wadiyan so gain

us ke hathon mein chuDi khanakti nahin us ke pairon mein pael jhanakti nahin

chhoD di main ne jab se gali pyar ki us ke kanon ki bhi baaliyan so gain

ek nadi ke kinare base ganw mein guzra bachpan mera chand ki chhanw mein

hum baDe jab hue ajnabi ho gae dil ke mandir ki sab dewiyan so gain

ghaT dil ka mere aaj sunsan hai koi gopi nahane ab aati nahin

meri murli ki dhun ab larazne lagi mere madhuban ki sab gopiyan so gain

aam ke peD shadab hain aaj bhi baurte aur phalte bhi hain wo magar

ab wo jhule kahan ab wo kajri kahan wo lachakti hui Daliyan so gain