baada-KHane ki riwayat ko nibhana chahiye

bāda-ḳhāne kī rivāyat ko nibhānā chāhiye

jaam agar ḳhālī bhī ho gardish meñ aanā chāhiye

aaj aanā hai unheñ lekin na aanā chāhiye

vā'da-e-fardā usūlan bhuul jaanā chāhiye

tark karnā chāhiye hargiz na rasm-e-intizār

muntazir ko umr bhar sham'eñ jalānā chāhiye

jazb kar lete haiñ achchhī sūratoñ ko aa.ine

ā.inoñ se kyā tumheñ āñkheñ milānā chāhiye

mere us ke biich jo hālāt kī dīvār hai

mujh ko us dīvār meñ ik dar banānā chāhiye

phir karam-āgīñ tabassum meñ hai poshīda sitam

hosh-mandoñ ko pahelī buujh jaanā chāhiye

gardish-e-hālāt se māyūs honā kufr hai

umr bhar insāñ ko qismat āzmānā chāhiye

merī ġhazleñ hoñgī kal nā-mahramoñ ke darmiyāñ

us kī ḳhushbū merī ġhazloñ meñ na aanā chāhiye

ham to qaa.il hī nahīñ mahdūd-e-ulfat ke 'alīm'

ham ko ulfat ke liye saarā zamāna chāhiye

baada-KHane ki riwayat ko nibhana chahiye

jam agar KHali bhi ho gardish mein aana chahiye

aaj aana hai unhen lekin na aana chahiye

wa'da-e-farda usulan bhul jaana chahiye

tark karna chahiye hargiz na rasm-e-intizar

muntazir ko umr bhar sham'en jalana chahiye

jazb kar lete hain achchhi suraton ko aaine

aainon se kya tumhein aankhen milana chahiye

mere us ke bich jo haalat ki diwar hai

mujh ko us diwar mein ek dar banana chahiye

phir karam-agin tabassum mein hai poshida sitam

hosh-mandon ko paheli bujh jaana chahiye

gardish-e-haalat se mayus hona kufr hai

umr bhar insan ko qismat aazmana chahiye

meri ghazlen hongi kal na-mahramon ke darmiyan

us ki KHushbu meri ghazlon mein na aana chahiye

hum to qail hi nahin mahdud-e-ulfat ke 'alim'

hum ko ulfat ke liye sara zamana chahiye