baadal jab unche parbat par dhund ki chadar tan gae

bādal jab ūñche parbat par dhund kī chādar taan ga.e

kyā kyā barsegā miTTī par saare saa.e jaan ga.e

phir dillī ke taḳht pe aa baiThā hai koī nādir-shāh

rangat ḳhushbū tak aa.egī is ke bhī imkān ga.e

chand kitābeñ kyā paḌh lī haiñ mere ahd ke bachchoñ ne

ḳhud ko to pahchān na paa.e duniyā ko pahchān ga.e

patā nahīñ kyā un ko merī chādar kitnī chhoTī hai

kaisī kaisī tohmat rakh kar mujh par sab mehmān ga.e

khod ke dekho un kī qabreñ mumkin hai kuchh patā chale

kahāñ chhupā kar saarī daulat bastī ke dhanvān ga.e

aane vaalī nasleñ apne ḳhvāb kahāñ mahkā.eñgī

ug aa.iiñ galiyāñ hī galiyāñ khule khule maidān ga.e

jin ke chehre dekh ke dil meñ ḳhushbū sī ghul jaatī thī

dhīre dhīre is bastī se vo saare insān ga.e

man kitnā gahrā sāgar hai tan kitnā ūñchā parbat

sādhū jab se gintī bhūle sāñsoñ ke anumān ga.e

jis din se 'parvāz' zamīñ par sannāToñ ke pahre haiñ

rāj-mahal sab khule paḌe haiñ chhuTTī par darbān ga.e

baadal jab unche parbat par dhund ki chadar tan gae

kya kya barsega miTTi par sare sae jaan gae

phir dilli ke taKHt pe aa baiTha hai koi nadir-shah

rangat KHushbu tak aaegi is ke bhi imkan gae

chand kitaben kya paDh li hain mere ahd ke bachchon ne

KHud ko to pahchan na pae duniya ko pahchan gae

pata nahin kya un ko meri chadar kitni chhoTi hai

kaisi kaisi tohmat rakh kar mujh par sab mehman gae

khod ke dekho un ki qabren mumkin hai kuchh pata chale

kahan chhupa kar sari daulat basti ke dhanwan gae

aane wali naslen apne KHwab kahan mahkaengi

ug aain galiyan hi galiyan khule khule maidan gae

jin ke chehre dekh ke dil mein KHushbu si ghul jati thi

dhire dhire is basti se wo sare insan gae

man kitna gahra sagar hai tan kitna uncha parbat

sadhu jab se ginti bhule sanson ke anuman gae

jis din se 'parwaz' zamin par sannaTon ke pahre hain

raj-mahal sab khule paDe hain chhuTTi par darban gae