baadalon ke TukDon mein aasman ka nila-pan

bādaloñ ke TukḌoñ meñ āsmāñ kā nīlā-pan

kaise bhūle sāvan kī rut kā vo rañgīlā-pan

Dhalne vaale haiñ motī chashm-e-nāz se shāyad

saaf kah rahā hai ye putliyoñ kā gīlā-pan

merī baat mat maano dasht meñ nikal jaao

aable batā deñge ḳhaar kā nokīlā-pan

shahd kī miThās aksar hoñT se Tapaktī thī

kis ne us ke lahje meñ bhar diyā kasīlā-pan

kaash itnī vus'at bhī 'ishq ko ḳhudā baḳhshe

jazb kar le āñkhoñ meñ āñsuoñ kā gīlā-pan

aap se mohabbat hai sādgī se kah Daalā

harf harf meñ lekin bhar diyā rasīlā-pan

ab qabā-e-gul shāyad apnā rang bhī badle

sabz sabz pattoñ par aa rahā hai pīlā-pan

baiTh jā.egā ik din zo'm kā mahal 'hairat'

rang lā.egā us ke zarf kā ye sīlā-pan

baadalon ke TukDon mein aasman ka nila-pan

kaise bhule sawan ki rut ka wo rangila-pan

Dhalne wale hain moti chashm-e-naz se shayad

saf kah raha hai ye putliyon ka gila-pan

meri baat mat mano dasht mein nikal jao

aable bata denge KHar ka nokila-pan

shahd ki miThas aksar honT se Tapakti thi

kis ne us ke lahje mein bhar diya kasila-pan

kash itni wus'at bhi 'ishq ko KHuda baKHshe

jazb kar le aankhon mein aansuon ka gila-pan

aap se mohabbat hai sadgi se kah Dala

harf harf mein lekin bhar diya rasila-pan

ab qaba-e-gul shayad apna rang bhi badle

sabz sabz patton par aa raha hai pila-pan

baiTh jaega ek din zo'm ka mahal 'hairat'

rang laega us ke zarf ka ye sila-pan