baadban kah rahe the naw se

bādbāñ kah rahe the naav se

koī bachtā nahīñ bahāo se

aag hī aag huuñ faqat maiñ bhī

kyoñ rahūñ duur is alaav se

kis qadar dil-nashīñ hai ġham terā

raushnī phūTtī hai ghaav se

log sastā samajhne lagte haiñ

milnā paḌtā hai rakh-rakhāv se

ashk ne'mat haiñ ye samajh aayā

raat aur din ke bhed-bhāv se

ḳhush rahī huuñ to bach ga.ī varna

kaun bachtā hai dukh ke daav se

bolnā siikh hī liyā āḳhir

niilī chiḌiyā ne ik mukā.v se

shukr-sad-shukr ḳhuub chamkī hai

shā'irī dard ke dabāv se

aap puurā hī kho chuke mujh ko

kyā milā bāhamī tanāo se

Dar hī lagtā hai ehtiyāt se ab

bachtī phirtī huuñ bach-bachāv se

thak bhī jā.ūñ to ruk nahīñ saktī

do qadam duur huuñ paḌāv se

baadban kah rahe the naw se

koi bachta nahin bahao se

aag hi aag hun faqat main bhi

kyon rahun dur is alaw se

kis qadar dil-nashin hai gham tera

raushni phuTti hai ghaw se

log sasta samajhne lagte hain

milna paDta hai rakh-rakhaw se

ashk ne'mat hain ye samajh aaya

raat aur din ke bhed-bhaw se

KHush rahi hun to bach gai warna

kaun bachta hai dukh ke daw se

bolna sikh hi liya aaKHir

nili chiDiya ne ek mukaw se

shukr-sad-shukr KHub chamki hai

sha'iri dard ke dabaw se

aap pura hi kho chuke mujh ko

kya mila bahami tanao se

Dar hi lagta hai ehtiyat se ab

bachti phirti hun bach-bachaw se

thak bhi jaun to ruk nahin sakti

do qadam dur hun paDaw se