bagh-e-bahisht ke makin kahte hain marhaba mujhe

bāġh-e-bahisht ke makīñ kahte haiñ marhabā mujhe

pheñk ke farsh-e-ḳhāk par bhuul gayā ḳhudā mujhe

maiñ tirā banda huuñ magar tere jahāñ kā rāzdār

tū hai mirā ḳhudā magar to nahīñ jāntā mujhe

sochtā huuñ sunā.ūñ kyā ahd-e-sitam kī dāstāñ

kahtā huuñ ḳhair chhoḌiye yaad nahīñ rahā mujhe

thā kisī saa.e kā ḳhayāl thī kisī gul kī justujū

dasht kī samt chal diyā dekh ke rāstā mujhe

roz nayā maqām hai roz na.ī umañg hai

terī talāsh kyā karūñ apnā nahīñ patā mujhe

rañg thā maiñ to kyuuñ zamīñ mujh se huī na lāla-zār

ḳhaak thā maiñ to kis liye le na uḌī havā mujhe

lamha-ba-lamha dam-ba-dam chaltā rahā qadam qadam

Dūbte chāñd kā safar kitnā aziiz thā mujhe

garche mirī chamak se band chashm-e-sitāra-o-falak

nuur huuñ phir bhī nuur kā rañg nahīñ milā mujhe

aañkh uThā ke merī samt ahl-e-nazar na dekh paa.e

aañkh na ho to kis qadar sahl hai dekhnā mujhe

bagh-e-bahisht ke makin kahte hain marhaba mujhe

phenk ke farsh-e-KHak par bhul gaya KHuda mujhe

main tera banda hun magar tere jahan ka raazdar

tu hai mera KHuda magar to nahin jaanta mujhe

sochta hun sunaun kya ahd-e-sitam ki dastan

kahta hun KHair chhoDiye yaad nahin raha mujhe

tha kisi sae ka KHayal thi kisi gul ki justuju

dasht ki samt chal diya dekh ke rasta mujhe

roz naya maqam hai roz nai umang hai

teri talash kya karun apna nahin pata mujhe

rang tha main to kyun zamin mujh se hui na lala-zar

KHak tha main to kis liye le na uDi hawa mujhe

lamha-ba-lamha dam-ba-dam chalta raha qadam qadam

Dubte chand ka safar kitna aziz tha mujhe

garche meri chamak se band chashm-e-sitara-o-falak

nur hun phir bhi nur ka rang nahin mila mujhe

aankh uTha ke meri samt ahl-e-nazar na dekh pae

aankh na ho to kis qadar sahl hai dekhna mujhe