bagh-e-jahan ke sada jamalon se ishq hai

bāġh-e-jahāñ ke saada jamāloñ se ishq hai

sabze se gul se sarv se lāloñ se ishq hai

haañ ḳhār-o-ḳhas se dil ko ilāqa hai paas kā

haañ is chaman ke taaza nihāloñ se ishq hai

saada sī guftugū ke ḳham-o-pech haiñ aziiz

ḳhāmoshiyoñ ke garm maqāloñ se ishq hai

jo bā-hunar haiñ un ke qadam chūmte haiñ ham

jo be-hunar haiñ un ke kamāloñ se ishq hai

būḌhoñ ke paara paara azā.em kā hai malāl

bachchoñ ke taaza taaza savāloñ se ishq hai

har be-navā faqīr ko dete haiñ ḳhūn-e-dil

har ḳhush-navā faqīr ke nāloñ se ishq hai

sāre-jahāñ ke talḳh-navāoñ se hai niyāz

sāre-jahāñ kī shīrīñ-maqāloñ se ishq hai

yā kufr-o-dīñ ke jānñe vāloñ se kyā ġharaz

yaañ kufr-o-dīñ ke mānñe vāloñ se ishq hai

bagh-e-jahan ke sada jamalon se ishq hai

sabze se gul se sarw se lalon se ishq hai

han KHar-o-KHas se dil ko ilaqa hai pas ka

han is chaman ke taza nihaalon se ishq hai

sada si guftugu ke KHam-o-pech hain aziz

KHamoshiyon ke garm maqalon se ishq hai

jo ba-hunar hain un ke qadam chumte hain hum

jo be-hunar hain un ke kamalon se ishq hai

buDhon ke para para azaem ka hai malal

bachchon ke taza taza sawalon se ishq hai

har be-nawa faqir ko dete hain KHun-e-dil

har KHush-nawa faqir ke nalon se ishq hai

sare-jahan ke talKH-nawaon se hai niyaz

sare-jahan ki shirin-maqalon se ishq hai

ya kufr-o-din ke jaanne walon se kya gharaz

yan kufr-o-din ke manne walon se ishq hai