bagh ka bagh ujaD gaya koi kaho pukar kar

baaġh kā baaġh ujaḌ gayā koī kaho pukār kar

kis ne shafaq pe mal diye phūloñ ke rañg utaar kar

shaam ko mauja-e-havā jānib-e-dasht le uḌe

sub.h chaman meñ aa ga.e ḳhaak pe shab guzār kar

sāya-e-āftāb meñ barg o sharar ThiThur ga.e

barf kahāñ se aa ga.ī dhuup kā ruup dhaar kar

paas hī manzil-e-murād ḳhaak meñ thī chhupī huī

raah meñ pā-burīda log baiTh chuke the haar kar

aaj tire ḳhayāl se dil ko bahut sakūñ milā

Duub chalī ye mauj bhī mujh ko ubhār ubhār kar

jalva-e-māhtāb bhī sho.abada-e-ḳhayāl hai

raat ke paas kuchh nahīñ sub.h kā intizār kar

valvala-e-hayāt ke dil meñ ka.ī charāg the

vaqt ne sab bujhā diye ek hī phūñk maar kar

bagh ka bagh ujaD gaya koi kaho pukar kar

kis ne shafaq pe mal diye phulon ke rang utar kar

sham ko mauja-e-hawa jaanib-e-dasht le uDe

subh chaman mein aa gae KHak pe shab guzar kar

saya-e-aftab mein barg o sharar ThiThur gae

barf kahan se aa gai dhup ka rup dhaar kar

pas hi manzil-e-murad KHak mein thi chhupi hui

rah mein pa-burida log baiTh chuke the haar kar

aaj tere KHayal se dil ko bahut sakun mila

Dub chali ye mauj bhi mujh ko ubhaar ubhaar kar

jalwa-e-mahtab bhi shoabada-e-KHayal hai

raat ke pas kuchh nahin subh ka intizar kar

walwala-e-hayat ke dil mein kai charag the

waqt ne sab bujha diye ek hi phunk mar kar