bagh se muttasil hai ek gali

baaġh se muttasil hai ek galī

jahāñ khiltī hai mere dil kī kalī

mahbas-e-dil meñ tum nahīñ aa.e

ek din to yahāñ havā bhī chalī

terī furqat ke daaġh dil meñ rakhe

tere kūche kī ḳhaak muñh pe malī

ek tū hai ki hai nazar aatā

ek maiñ huuñ ki huuñ ḳhafī na jalī

zar-e-ḳhairāt pheñk detā huuñ

kaun chakkhe saḳhāvatoñ kī Dalī

sūkhne vaale phir hare na hue

raah kī ghaas phir na phūlī-phalī

pūchhte ho ki kaun hai 'ikrām'

kabhī dekhā hai kyā jadīd 'valī'

bagh se muttasil hai ek gali

jahan khilti hai mere dil ki kali

mahbas-e-dil mein tum nahin aae

ek din to yahan hawa bhi chali

teri furqat ke dagh dil mein rakhe

tere kuche ki KHak munh pe mali

ek tu hai ki hai nazar aata

ek main hun ki hun KHafi na jali

zar-e-KHairaat phenk deta hun

kaun chakkhe saKHawaton ki Dali

sukhne wale phir hare na hue

rah ki ghas phir na phuli-phali

puchhte ho ki kaun hai 'ikram'

kabhi dekha hai kya jadid 'wali'