baghban ki be-ruKHi se nile-pile ho gae

bāġhbāñ kī be-ruḳhī se nīle-pīle ho ga.e

ḳhaar kī mānind ab gul bhī nukīle ho ga.e

bahte dariyā se sabhī sairāb haiñ lekin mujhe

sirf ik qatra milā bas hoñT giile ho ga.e

mai-kashoñ ne bas qadam rakkhā thā sehn-e-bāġh meñ

phūl-patte bel-būTe sab nashīle ho ga.e

ek hī aadam se haiñ lekin siyāsat ke nisār

kis qadar firqe bane kitne qabīle ho ga.e

mere bachpan kā zamāna phuul kā ambār thā

jaise hī bachpan gayā ambār Tiile ho ga.e

ik nazar tanqīd kī paḌne kī 'ārif' der thī

sher jitne the ġhazal meñ sab rasīle ho ga.e

baghban ki be-ruKHi se nile-pile ho gae

KHar ki manind ab gul bhi nukile ho gae

bahte dariya se sabhi sairab hain lekin mujhe

sirf ek qatra mila bas honT gile ho gae

mai-kashon ne bas qadam rakkha tha sehn-e-bagh mein

phul-patte bel-buTe sab nashile ho gae

ek hi aadam se hain lekin siyasat ke nisar

kis qadar firqe bane kitne qabile ho gae

mere bachpan ka zamana phul ka ambar tha

jaise hi bachpan gaya ambar Tile ho gae

ek nazar tanqid ki paDne ki 'arif' der thi

sher jitne the ghazal mein sab rasile ho gae