bahar bahar dekh chuka to ab kuchh apne andar dekh

bāhar bāhar dekh chukā to ab kuchh apne andar dekh

nazzāre kā lutf yahī hai alag alag har manzar dekh

uupar uupar bahtā paanī nīche nīche aag dabī

jaltī bujhtī aag ke andar sahrā dekh samundar dekh

aag pe chalnā daar pe chalnā din ke nagar kā qissa ye

shab kī kahānī ye ki badan par be-ḳhvābī kī chādar dekh

raste baste ghar hī nahīñ ābād hai saarā shahar magar

ik āsebī sannāTā hai andar dekh ki bāhar dekh

ghar vaale bezār gharoñ se diloñ se ġhā.eb dildārī

yahī tamāshā apne ghar meñ yahī tamāshā ghar ghar dekh

kuchh kuchh aañkh meñ dard chhupā.e kuchh kuchh dil meñ Dartā sā

aas kī sūkhī shāḳh pe baiThā ek parinda be-par dekh

apnā apnā sar kāñdhe par sar par apnā apnā bojh

duniyā ghar kā bojh uThā.e mujh ko dekh sarāsar dekh

bahar bahar dekh chuka to ab kuchh apne andar dekh

nazzare ka lutf yahi hai alag alag har manzar dekh

upar upar bahta pani niche niche aag dabi

jalti bujhti aag ke andar sahra dekh samundar dekh

aag pe chalna dar pe chalna din ke nagar ka qissa ye

shab ki kahani ye ki badan par be-KHwabi ki chadar dekh

raste baste ghar hi nahin aabaad hai sara shahar magar

ek aasebi sannaTa hai andar dekh ki bahar dekh

ghar wale bezar gharon se dilon se ghaeb dildari

yahi tamasha apne ghar mein yahi tamasha ghar ghar dekh

kuchh kuchh aankh mein dard chhupae kuchh kuchh dil mein Darta sa

aas ki sukhi shaKH pe baiTha ek parinda be-par dekh

apna apna sar kandhe par sar par apna apna bojh

duniya ghar ka bojh uThae mujh ko dekh sarasar dekh