bahar hisar-e-gham se faqat dekhne mein tha

bāhar hisār-e-ġham se faqat dekhne meñ thā

uljhā huā to vo bhī kisī mas.ale meñ thā

yuuñ bhī ġhalat umiid kā ilzām aa gayā

hālāñki har savāl mirā zābte meñ thā

duniyā kī fikr tujh ko mujhe thā tirā ḳhayāl

bas itnā farq tere mire sochne meñ thā

har shaḳhs apne-āp ko samjhe hue thā miir

taqlīd-e-kār koī kahāñ qāfile meñ thā

patthar vahīñ se aate the mujh ko navāzne

shīshe kā ik makāñ jo mire rāste meñ thā

'sultān' hukmarāñ thā vo har lamha zehn par

mashġhūl raat din maiñ jise bhūlne meñ thā

bahar hisar-e-gham se faqat dekhne mein tha

uljha hua to wo bhi kisi masale mein tha

yun bhi ghalat umid ka ilzam aa gaya

haalanki har sawal mera zabte mein tha

duniya ki fikr tujh ko mujhe tha tera KHayal

bas itna farq tere mere sochne mein tha

har shaKHs apne-ap ko samjhe hue tha mir

taqlid-e-kar koi kahan qafile mein tha

patthar wahin se aate the mujh ko nawazne

shishe ka ek makan jo mere raste mein tha

'sultan' hukmaran tha wo har lamha zehn par

mashghul raat din main jise bhulne mein tha