bahar ka mahaul to hum ko aksar achchha lagta hai

bāhar kā māhaul to ham ko aksar achchhā lagtā hai

shaam se ik din ghar meñ rah kar dekheñ kaisā lagtā hai

kis kī yādeñ kis ke chehre ugte haiñ tanhā.ī meñ

āñgan kī dīvāroñ par kuchh saaya saaya lagtā hai

jismoñ ke is jañgal meñ bas ek hī rām-kahānī hai

ġhaur se dekho to har chehra apnā chehrā lagtā hai

mausam kī ayyāsh havā ne kachche phal bhī toḌ liye

shāḳh pe larzāñ pattā pattā sahmā sahmā lagtā hai

daana daana daam lagā hai jaal bichhā hai paanī par

hā.e-re ye ma.asūm kabūtar kitnā bholā lagtā hai

surḳh parinda Duub rahā hai kaalī jhiil ke paanī meñ

sach kahnā ai sāhil vaalo tum ko kaisā lagtā hai

saa.e kī ummīd na rakhiye patthar kī chaTTānoñ se

bosīda dīvār kā saaya phir bhī saaya lagtā hai

mahrūmī kī tasvīreñ bhī kitnī dil-kash hotī haiñ

thak kar sone vaale ko har ḳhvāb sunahrā lagtā hai

uḌ ke parinde paar na paa.eñ shaam ko thak kar lauT aa.eñ

'hosh' mujhe ye saarā aalam ek jazīra lagtā hai

bahar ka mahaul to hum ko aksar achchha lagta hai

sham se ek din ghar mein rah kar dekhen kaisa lagta hai

kis ki yaaden kis ke chehre ugte hain tanhai mein

aangan ki diwaron par kuchh saya saya lagta hai

jismon ke is jangal mein bas ek hi ram-kahani hai

ghaur se dekho to har chehra apna chehra lagta hai

mausam ki ayyash hawa ne kachche phal bhi toD liye

shaKH pe larzan patta patta sahma sahma lagta hai

dana dana dam laga hai jal bichha hai pani par

hae-re ye masum kabutar kitna bhola lagta hai

surKH parinda Dub raha hai kali jhil ke pani mein

sach kahna ai sahil walo tum ko kaisa lagta hai

sae ki ummid na rakhiye patthar ki chaTTanon se

bosida diwar ka saya phir bhi saya lagta hai

mahrumi ki taswiren bhi kitni dil-kash hoti hain

thak kar sone wale ko har KHwab sunahra lagta hai

uD ke parinde par na paen sham ko thak kar lauT aaen

'hosh' mujhe ye sara aalam ek jazira lagta hai