bahar KHala hai zat ke andar bhi kuchh nahin

bāhar ḳhalā hai zaat ke andar bhī kuchh nahīñ

dekho to Dar bahut hai magar Dar bhī kuchh nahīñ

phūloñ kī sej kuchh nahīñ bistar bhī kuchh nahīñ

gum-gashta aadmī ke liye ghar bhī kuchh nahīñ

būḌhe shajar ukhaḌ ga.e to kyā muzā.iqa

pāgal havā chalegī to patthar bhī kuchh nahīñ

ātish-mizāj log bhī kahte sune ga.e

sūraj bhī vahm hai mah-o-aḳhtar bhī kuchh nahīñ

ā.īna-vār ḳhush haiñ bahut be-libāsiyāñ

jaise ki nang-o-nām kī chādar bhī kuchh nahīñ

ye kyā ki mausam-e-sitam-ījād ke liye

barg-o-samar bhī hech ġhul-e-tar bhī kuchh nahīñ

mujh ko haqīr kahne se pahle ye soch le

qatra jo kuchh nahīñ to samundar bhī kuchh nahīñ

āvārgān-e-shauq ke aage huā to kyā

mahshar-qadam balāoñ ke lashkar bhī kuchh nahīñ

fikr-e-suḳhan meñ ḳhuun jalā kar pata chalā

saudā bhī ek vahm hai aur sar bhī kuchh nahīñ

tark-e-talab bhī sochiye 'tanhā' to Thiik hai

lekin phir apne shauq se behtar bhī kuchh nahīñ

bahar KHala hai zat ke andar bhi kuchh nahin

dekho to Dar bahut hai magar Dar bhi kuchh nahin

phulon ki sej kuchh nahin bistar bhi kuchh nahin

gum-gashta aadmi ke liye ghar bhi kuchh nahin

buDhe shajar ukhaD gae to kya muzaiqa

pagal hawa chalegi to patthar bhi kuchh nahin

aatish-mizaj log bhi kahte sune gae

suraj bhi wahm hai mah-o-aKHtar bhi kuchh nahin

aaina-war KHush hain bahut be-libasiyan

jaise ki nang-o-nam ki chadar bhi kuchh nahin

ye kya ki mausam-e-sitam-ijad ke liye

barg-o-samar bhi hech ghul-e-tar bhi kuchh nahin

mujh ko haqir kahne se pahle ye soch le

qatra jo kuchh nahin to samundar bhi kuchh nahin

aawargan-e-shauq ke aage hua to kya

mahshar-qadam balaon ke lashkar bhi kuchh nahin

fikr-e-suKHan mein KHun jala kar pata chala

sauda bhi ek wahm hai aur sar bhi kuchh nahin

tark-e-talab bhi sochiye 'tanha' to Thik hai

lekin phir apne shauq se behtar bhi kuchh nahin