baal-bachchon ke ishaaron pe hi jab nachna hai

bāl-bachchoñ ke ishāroñ pe hī jab nāchnā hai

kyā ye socheñ ki kahāñ nāchnā kab nāchnā hai

us se lau maiñ ne lagā lī hai to ab sochnā kyā

jis tarah mujh ko nachā.e mirā rab nāchnā hai

apnī hī dhun meñ basar karne haiñ baaqī shab-o-roz

lai pe auroñ kī na gaanā hai na ab nāchnā hai

apnā ham-raqs banā hī nahīñ saktā maiñ use

zehn meñ rakh ke jise nām-o-nasab nāchnā hai

ghuñgrūoñ se hī bujhānī hai jinheñ peT kī aag

toḌ kar un ko to har hadd-e-adab nāchnā hai

maiñ jahāñ din ke ujāloñ meñ nahīñ jā saktā

ban ke un galiyoñ meñ āvāra-e-shab nāchnā hai

aisī fankārī pe kyā naaz kareñ ham 'shāhid'

ḳhud sajā kar hī agar bazm-e-tarab nāchnā hai

baal-bachchon ke ishaaron pe hi jab nachna hai

kya ye sochen ki kahan nachna kab nachna hai

us se lau main ne laga li hai to ab sochna kya

jis tarah mujh ko nachae mera rab nachna hai

apni hi dhun mein basar karne hain baqi shab-o-roz

lai pe auron ki na gana hai na ab nachna hai

apna ham-raqs bana hi nahin sakta main use

zehn mein rakh ke jise nam-o-nasab nachna hai

ghungruon se hi bujhani hai jinhen peT ki aag

toD kar un ko to har hadd-e-adab nachna hai

main jahan din ke ujalon mein nahin ja sakta

ban ke un galiyon mein aawara-e-shab nachna hai

aisi fankari pe kya naz karen hum 'shahid'

KHud saja kar hi agar bazm-e-tarab nachna hai