baala-e-farsh gar na tah-e-asman rahe

bālā-e-farsh gar na tah-e-āsmāñ rahe

ye aadmī batāo ki jā kar kahāñ rahe

aa.e haiñ zindagī meñ kuchh aise bhī marhale

maiñ thā magar na saath mire rāz-dāñ rahe

kaT jaa.e sar yahī to hai paiġhām-e-karbalā

baaqī magar namāz rahe aur azaañ rahe

manzūr shahr-e-dil meñ basānā nahīñ agar

phir vo jagah batā do ye 'āshiq jahāñ rahe

manzil simaT ke ḳhud tire qadmoñ meñ aa.egī

ye shart hai ki himmat-e-mardāñ javāñ rahe

us maslahat-parast ko jiine kā haq nahīñ

muñh meñ zabān rakh ke bhī jo be-zabāñ rahe

kirdār aisā ho pas-e-murdan meñ bazm meñ

ahbāb kī zabāñ pe tirī dāstāñ rahe

ye jaan kar kiyā gayā hai ‘ahd-e-dostī

tarfain ke 'ilāqoñ meñ amn-o-amāñ rahe

sahrā-navardiyoñ meñ guzārī hai zindagī

ham gulsitān-e-dahr meñ be-āshiyāñ rahe

zālim ne soch kar ye zabāñ kaaT dī 'kashish'

mazlūm kī zabāñ pe na āh-o-fuġhāñ rahe

baala-e-farsh gar na tah-e-asman rahe

ye aadmi batao ki ja kar kahan rahe

aae hain zindagi mein kuchh aise bhi marhale

main tha magar na sath mere raaz-dan rahe

kaT jae sar yahi to hai paigham-e-karbala

baqi magar namaz rahe aur azan rahe

manzur shahr-e-dil mein basana nahin agar

phir wo jagah bata do ye 'ashiq jahan rahe

manzil simaT ke KHud tere qadmon mein aaegi

ye shart hai ki himmat-e-mardan jawan rahe

us maslahat-parast ko jine ka haq nahin

munh mein zaban rakh ke bhi jo be-zaban rahe

kirdar aisa ho pas-e-murdan mein bazm mein

ahbab ki zaban pe teri dastan rahe

ye jaan kar kiya gaya hai ‘ahd-e-dosti

tarfain ke 'ilaqon mein amn-o-aman rahe

sahra-nawardiyon mein guzari hai zindagi

hum gulsitan-e-dahr mein be-ashiyan rahe

zalim ne soch kar ye zaban kaT di 'kashish'

mazlum ki zaban pe na aah-o-fughan rahe