baam-e-talat ki fana-fam bahaaro jao

bām-e-tal.at kī fanā-fām bahāro jaao

rang-e-hirmāñ ko jabīnoñ pe sahāro jaao

hameñ iz'ān-e-havādis meñ lipaTtā chhoḌo

ḳhātir-e-sahn-e-talattuf ko pukāro jaao

garmī-e-rang kī har lahr mubārak ho hameñ

chashm-e-be-dīd kā ehsān utāro jaao

sho.ala-e-zāt lapak bhuul ke so jā.egā

tum bhī ai hurmat-e-hangām ke maaro jaao

jū-e-āvāra ko juz aks-guzārī kyā hai

abas andāz na bah jaao sitāro jaao

sā.at-e-hāl rahe sūrat-e-tasbīh ba-kaf

dast-e-auqāt ko bas sar se guzāro jaao

zinda rahne kī banāvaT meñ koī fat.h nahīñ

nafs āmāda kiye jaan se haaro jaao

baam-e-talat ki fana-fam bahaaro jao

rang-e-hirman ko jabinon pe sahaaro jao

hamein iz'an-e-hawadis mein lipaTta chhoDo

KHatir-e-sahn-e-talattuf ko pukaro jao

garmi-e-rang ki har lahr mubarak ho hamein

chashm-e-be-did ka ehsan utaro jao

shoala-e-zat lapak bhul ke so jaega

tum bhi ai hurmat-e-hangam ke maro jao

ju-e-awara ko juz aks-guzari kya hai

abas andaz na bah jao sitaro jao

saat-e-haal rahe surat-e-tasbih ba-kaf

dast-e-auqat ko bas sar se guzaro jao

zinda rahne ki banawaT mein koi fath nahin

nafs aamada kiye jaan se haaro jao