baam-o-dar TuT gae bah gaya pani kitna

bām-o-dar TuuT ga.e bah gayā paanī kitnā

aur barbād karegī ye javānī kitnā

rañg kumhlā diyā bāloñ meñ piro dī chāñdī

tuul khīñchegī abhī aur kahānī kitnā

ye talātum ye anā ābla-pā.ī ye junūñ

ham bhī dekheñge ki hai josh-e-javānī kitnā

darmiyāñ aa gayā ib.hām kā ik koh garāñ

DhūñDte rah ga.e ham dasht-e-ma.ānī kitnā

barf kī tarah jame jaate haiñ saare alfāz

kaam aa.egī yahāñ sehr-bayānī kitnā

Duub kar sāñsoñ meñ rag rag meñ samā kar dekho

mas.ala dil kā sulajhtā hai zabānī kitnā

baḌhtā jā.egā ye sailāb-e-havādis 'shāhid'

rok pā.egā koī zor-e-ravānī kitnā

baam-o-dar TuT gae bah gaya pani kitna

aur barbaad karegi ye jawani kitna

rang kumhla diya baalon mein piro di chandi

tul khinchegi abhi aur kahani kitna

ye talatum ye ana aabla-pai ye junun

hum bhi dekhenge ki hai josh-e-jawani kitna

darmiyan aa gaya ibham ka ek koh garan

DhunDte rah gae hum dasht-e-maani kitna

barf ki tarah jame jate hain sare alfaz

kaam aaegi yahan sehr-bayani kitna

Dub kar sanson mein rag rag mein sama kar dekho

masala dil ka sulajhta hai zabani kitna

baDhta jaega ye sailab-e-hawadis 'shahid'

rok paega koi zor-e-rawani kitna