banTne walon ne jab apna paraya banTa

bāñTne vāloñ ne jab apnā parāyā bāñTā

bhaa.ī ne bhaa.ī se dīvār kā saaya bāñTā

sāz-o-sāmān kī taqsīm na.ī baat nahīñ

mere apnoñ ne Thaharne kā kirāya bāñTā

bāñTne vāloñ se kī saarī kamā.ī us ne

maiñ ne jo bāñTā vo sab apnā kamāyā bāñTā

jā.edād us kī kahāñ phir bhī salīqe se baTī

go ki logoñ ne use hasb-e-vasāyā bāñTā

baañT paayā na añdherā mire tan ko ab tak

vo ujālā hai ki jis ne mirā saaya bāñTā

ab bhī phailā.e hue dast-e-talab haiñ kitne

tū ne kyā kyā na zamāne meñ ḳhudāyā bāñTā

tajraba bahr-e-suḳhan raas jo aaya tujh ko

tū ne ai 'badr' use jam' kiyā yā bāñTā

banTne walon ne jab apna paraya banTa

bhai ne bhai se diwar ka saya banTa

saz-o-saman ki taqsim nai baat nahin

mere apnon ne Thaharne ka kiraya banTa

banTne walon se ki sari kamai us ne

main ne jo banTa wo sab apna kamaya banTa

jaedad us ki kahan phir bhi saliqe se baTi

go ki logon ne use hasb-e-wasaya banTa

banT paya na andhera mere tan ko ab tak

wo ujala hai ki jis ne mera saya banTa

ab bhi phailae hue dast-e-talab hain kitne

tu ne kya kya na zamane mein KHudaya banTa

tajraba bahr-e-suKHan ras jo aaya tujh ko

tu ne ai 'badr' use jam' kiya ya banTa