bar-bar jite hain bar-bar marte hain

bār-bār jiite haiñ bār-bār marte haiñ

yuuñ vafā kī duniyā meñ apne din guzarte haiñ

aaj gesū-e-hastī ‘asr-e-nau ke shāne se

utne hī ulajhte haiñ jis qadar sañvarte haiñ

har qadam pe milte haiñ teġh-o-dār ke saa.e

muzhda-e-mohabbat ham phir bhī ‘aam karte haiñ

kis ko hosh rahtā hai mai-kade meñ hastī ke

us dam aañkh khultī hai jab nashe utarte haiñ

kab nazar meñ un kī hai farq-e-kāfir-o-dīñ-dār

jo tirī mohabbat kā dam jahāñ meñ bharte haiñ

abr-e-rahmat uThtā hai jhuum jhuum kar paiham

jis maqām se bhī ham ahl-e-ġham guzarte haiñ

ḳhānqāh ke din bhī haiñ do-chār zulmat se

mai-kade meñ rātoñ ko āftāb ubharte haiñ

shaiḳh aur barahman ke hathkañDe are tauba

aadmī ko begāna aadmī se karte haiñ

shikva-e-bahārāñ kyoñ kar rahe ho 'rehānī'

ḳhūn-e-dil khapāne se gulsitāñ nikharte haiñ

bar-bar jite hain bar-bar marte hain

yun wafa ki duniya mein apne din guzarte hain

aaj gesu-e-hasti ‘asr-e-nau ke shane se

utne hi ulajhte hain jis qadar sanwarte hain

har qadam pe milte hain tegh-o-dar ke sae

muzhda-e-mohabbat hum phir bhi ‘am karte hain

kis ko hosh rahta hai mai-kade mein hasti ke

us dam aankh khulti hai jab nashe utarte hain

kab nazar mein un ki hai farq-e-kafir-o-din-dar

jo teri mohabbat ka dam jahan mein bharte hain

abr-e-rahmat uThta hai jhum jhum kar paiham

jis maqam se bhi hum ahl-e-gham guzarte hain

KHanqah ke din bhi hain do-chaar zulmat se

mai-kade mein raaton ko aaftab ubharte hain

shaiKH aur barahman ke hathkanDe are tauba

aadmi ko begana aadmi se karte hain

shikwa-e-bahaaran kyon kar rahe ho 'rehani'

KHun-e-dil khapane se gulsitan nikharte hain