barha di hai sada dil ne KHuda gum-sum hai

bārhā dī hai sadā dil ne ḳhudā gum-sum hai

haath phailā.e ka.ī baar ḳhudā gum-sum hai

dene vāloñ ko binā māñge diyā hai us ne

māñgne vāloñ se le kar bhī ḳhudā gum-sum hai

muñh meñ ho ḳhaak mire shikva-kunāñ lagtā huuñ

shikva bhī kartā huuñ to dil kī fazā gum-sum hai

hai ḳhamoshī bhī qayāmat sī kahīñ shor nahīñ

sab charāġhoñ ko bujhā kar bhī havā gum-sum hai

paañv jakḌe hue baiThī hai zamīñ yāroñ ke

vaqt aayā hai to yāroñ kī vafā gum-sum hai

ab guzartī hai ḳhudāoñ pe qayāmat kaisī

dar pe baiThā hai tire aur gadā gum-sum hai

kaise kah duuñ ki bichhaḌnā hai munāsib 'rāmiz'

sochne bhī do mire dil ko zarā gum-sum hai

barha di hai sada dil ne KHuda gum-sum hai

hath phailae kai bar KHuda gum-sum hai

dene walon ko bina mange diya hai us ne

mangne walon se le kar bhi KHuda gum-sum hai

munh mein ho KHak mere shikwa-kunan lagta hun

shikwa bhi karta hun to dil ki faza gum-sum hai

hai KHamoshi bhi qayamat si kahin shor nahin

sab charaghon ko bujha kar bhi hawa gum-sum hai

panw jakDe hue baiThi hai zamin yaron ke

waqt aaya hai to yaron ki wafa gum-sum hai

ab guzarti hai KHudaon pe qayamat kaisi

dar pe baiTha hai tere aur gada gum-sum hai

kaise kah dun ki bichhaDna hai munasib 'ramiz'

sochne bhi do mere dil ko zara gum-sum hai