barha Dub ke har bar ubhar aane ka

bārhā Duub ke har baar ubhar aane kā

zindagī naam hai mar mar ke jiye jaane kā

mustarad jis ko kiyā tū ne bahāna kar ke

vahī kirdār aham thā tire afsāne kā

maiñ to sūraj ko hathelī pe liye phirtā huuñ

maiñ charāġhoñ se miyāñ ḳhauf nahīñ khāne kā

ahl-e-dānish haiñ takabbur meñ kareñ kyā sāhib

un meñ jazba hai samajhne kā na samjhāne kā

ham ne majzūb mizāj apnā banā rakkhā hai

hai yahī ek bahāna tire yaad aane kā

dil-e-muztar ye taḌap ishq kā e.azāz samajh

chain mil jaa.e to har haal meñ Thukrāne kā

is liye chāñd sī raushan haiñ bujhī ho kar bhī

merī āñkhoñ meñ hai jo ḳhvāb tujhe paane kā

mai-kashī nām-o-nasab kī jo ġhulām aaj huī

sāqiyā raaz khulā ab tire maiḳhāne kā

tū na majnūñ hai na farhād na rāñjhā 'shādāb'

haañ magar aks hai tujh meñ kisī dīvāne kā

barha Dub ke har bar ubhar aane ka

zindagi nam hai mar mar ke jiye jaane ka

mustarad jis ko kiya tu ne bahana kar ke

wahi kirdar aham tha tere afsane ka

main to suraj ko hatheli pe liye phirta hun

main charaghon se miyan KHauf nahin khane ka

ahl-e-danish hain takabbur mein karen kya sahib

un mein jazba hai samajhne ka na samjhane ka

hum ne majzub mizaj apna bana rakkha hai

hai yahi ek bahana tere yaad aane ka

dil-e-muztar ye taDap ishq ka eazaz samajh

chain mil jae to har haal mein Thukrane ka

is liye chand si raushan hain bujhi ho kar bhi

meri aankhon mein hai jo KHwab tujhe pane ka

mai-kashi nam-o-nasab ki jo ghulam aaj hui

saqiya raaz khula ab tere maiKHane ka

tu na majnun hai na farhad na ranjha 'shadab'

han magar aks hai tujh mein kisi diwane ka