barish hui to shahr ke talab bhar gae

bārish huī to shahr ke tālāb bhar ga.e

kuchh log Dūbte hue dhul kar nikhar ga.e

sūraj chamak uThā to nigāheñ bhaTak ga.iiñ

aa.ī jo sub.h-e-nau to basārat se Dar ga.e

dariyā biphar ga.e to samundar se jā mile

Duube jo un ke saath kināre kidhar ga.e

dulhan kī surḳh maañg se afshāñ jo gir ga.ī

lamhoñ kī shoḳh jhiil meñ taare bikhar ga.e

phir dasht-e-intizār meñ khilne lage kañval

palkoñ se jhāñkte hue lamhe sañvar ga.e

bujhte hue charāġh hathelī pe jal ga.e

jhoñke tumhārī yaad ke dil meñ utar ga.e

sochā tumheñ to dard kī sadiyāñ pighal ga.iiñ

dekhā tumheñ to vaqt ke dariyā Thahar ga.e

tum to bharī bahār meñ khilte rahe magar

ham zaḳhm kā.enāt the kāñToñ se bhar ga.e

'ishrat' shab-e-nashāt ke jugnū liye hue

ham jashn-e-zar-nigāh meñ pariyoñ ke ghar ga.e

barish hui to shahr ke talab bhar gae

kuchh log Dubte hue dhul kar nikhar gae

suraj chamak uTha to nigahen bhaTak gain

aai jo subh-e-nau to basarat se Dar gae

dariya biphar gae to samundar se ja mile

Dube jo un ke sath kinare kidhar gae

dulhan ki surKH mang se afshan jo gir gai

lamhon ki shoKH jhil mein tare bikhar gae

phir dasht-e-intizar mein khilne lage kanwal

palkon se jhankte hue lamhe sanwar gae

bujhte hue charagh hatheli pe jal gae

jhonke tumhaari yaad ke dil mein utar gae

socha tumhein to dard ki sadiyan pighal gain

dekha tumhein to waqt ke dariya Thahar gae

tum to bhari bahaar mein khilte rahe magar

hum zaKHm kaenat the kanTon se bhar gae

'ishrat' shab-e-nashat ke jugnu liye hue

hum jashn-e-zar-nigah mein pariyon ke ghar gae