barish ruki wabaon ka baadal bhi chhaT gaya

bārish rukī vabāoñ kā bādal bhī chhaT gayā

aisī chaleñ havā.eñ ki mausam palaT gayā

patthar pe gir ke ā.īna TukḌoñ meñ baT gayā

kitnā mire vajūd kā paikar simaT gayā

kaTtā nahīñ hai sard-o-siyah-rāt kā pahāḌ

sūraj thā saḳht dhuup thī din phir bhī kaT gayā

chhāleñ shajar shajar se utarne ko aa ga.iiñ

bosīda pairahan huā itnā ki phaT gayā

talvār be-yaqīnī ke hāthoñ meñ aa ga.ī

apne muqāble meñ har ik shaḳhs DaT gayā

jab tak na chhū ke dekhā thā vus.at thī aap meñ

dekhā to chhūī-mūī kā paudā simaT gayā

saaya thā bhāgtā thā bahut merī dhuup se

vo shaḳhs ki jo mere gale se chimaT gayā

barish ruki wabaon ka baadal bhi chhaT gaya

aisi chalen hawaen ki mausam palaT gaya

patthar pe gir ke aaina TukDon mein baT gaya

kitna mere wajud ka paikar simaT gaya

kaTta nahin hai sard-o-siyah-raat ka pahaD

suraj tha saKHt dhup thi din phir bhi kaT gaya

chhaalen shajar shajar se utarne ko aa gain

bosida pairahan hua itna ki phaT gaya

talwar be-yaqini ke hathon mein aa gai

apne muqable mein har ek shaKHs DaT gaya

jab tak na chhu ke dekha tha wusat thi aap mein

dekha to chhui-mui ka pauda simaT gaya

saya tha bhagta tha bahut meri dhup se

wo shaKHs ki jo mere gale se chimaT gaya