barishen KHun ki tez hain tez hain KHun ki aandhiyan

bārisheñ ḳhuun kī tez haiñ tez haiñ ḳhuun kī āñdhiyāñ

chāk-dar-chāk uḌne lagīñ ḳhuun meñ ziist kī chhatriyāñ

raat petrol kī aag se shahr meñ yuuñ charāġhāñ huā

kaañp kar bujh ga.iiñ dil ke raushan jharokoñ kī sab battiyāñ

be-amāñ ḳhalq curfew-zada roz-o-shab ke añdhere meñ gum

apnī gardan meñ Daale hue apne katbāt kī taḳhtiyāñ

donoñ hī likh rahī thiiñ lahū se mire sāneha qatl kā

ik taraf hamla-var āstīñ ik taraf pāsbāñ vardiyāñ

gar yūñhī aag dāman se uThtī rahī to jalā Dālegī

husn-e-gul-rañg kā pairahan ishq-e-gulnār kī dhajjiyāñ

jaltī āñkhoñ ke motī pighalte rahe aur ehsās ke

reg-zāroñ meñ taptī rahīñ mere ḳhvāboñ kī parchhā.iyāñ

marg-e-amboh kā jashn-e-mātam hai raushan kareñ ham 'shahāb'

phuljhaḌī ashk-e-ḳhush-rañg kī taaza zaḳhmoñ kī mahtābiyāñ

barishen KHun ki tez hain tez hain KHun ki aandhiyan

chaak-dar-chaak uDne lagin KHun mein zist ki chhatriyan

raat petrol ki aag se shahr mein yun charaghan hua

kanp kar bujh gain dil ke raushan jharokon ki sab battiyan

be-aman KHalq curfew-zada roz-o-shab ke andhere mein gum

apni gardan mein Dale hue apne katbaat ki taKHtiyan

donon hi likh rahi thin lahu se mere saneha qatl ka

ek taraf hamla-war aastin ek taraf pasban wardiyan

gar yunhi aag daman se uThti rahi to jala Dalegi

husn-e-gul-rang ka pairahan ishq-e-gulnar ki dhajjiyan

jalti aankhon ke moti pighalte rahe aur ehsas ke

reg-zaron mein tapti rahin mere KHwabon ki parchhaiyan

marg-e-amboh ka jashn-e-matam hai raushan karen hum 'shahab'

phuljhaDi ashk-e-KHush-rang ki taza zaKHmon ki mahtabiyan