baat ho dair-o-haram ki ya watan ki baat ho

baat ho dair-o-haram kī yā vatan kī baat ho

baat jab ho dostoñ husn-e-chaman kī baat ho

desh kī ḳhātir ḳhushī se jo luTā dete haiñ jaañ

un shahīdān-e-vatan ke bāñkpan kī baat ho

qaum-o-maz.hab kyā kisī kā aur kyā hai rañg-o-nasl

aisī bāteñ chhoḌ kar bas ilm-o-fan kī baat ho

'asr-e-hāzir ne hamārā dil bhī patthar kar diyā

lāzmī hai ab vafāoñ ke chalan kī baat ho

is ‘amal se zindagī ho jā.egī āsāñ bahut

aisā kuchh mat boliye jis meñ chubhan kī baat ho

ek hī rañgat hai sab ke ḳhuun kī to dosto

kyuuñ hamāre biich shaiḳh-o-barhaman kī baat ho

mil ke baiThe haiñ to yaaro ab sunā.eñ hāl-e-dil

kuchh tumhāre dil kī ho kuchh mere man kī baat ho

baat ho dair-o-haram ki ya watan ki baat ho

baat jab ho doston husn-e-chaman ki baat ho

desh ki KHatir KHushi se jo luTa dete hain jaan

un shahidan-e-watan ke bankpan ki baat ho

qaum-o-mazhab kya kisi ka aur kya hai rang-o-nasl

aisi baaten chhoD kar bas ilm-o-fan ki baat ho

'asr-e-hazir ne hamara dil bhi patthar kar diya

lazmi hai ab wafaon ke chalan ki baat ho

is ‘amal se zindagi ho jaegi aasan bahut

aisa kuchh mat boliye jis mein chubhan ki baat ho

ek hi rangat hai sab ke KHun ki to dosto

kyun hamare bich shaiKH-o-barhaman ki baat ho

mil ke baiThe hain to yaro ab sunaen haal-e-dil

kuchh tumhaare dil ki ho kuchh mere man ki baat ho