baat itni bhi na thi ji se guzar jate hum

baat itnī bhī na thī jī se guzar jaate ham

ik nigāh-e-ġhalat-andāz se mar jaate ham

ab to yuuñ lagtā hai bas ġham ne jakaḌ rakkhā hai

ġham na hote to bhalā kab ke bikhar jaate ham

dopahar bhī na Dhalī aur na patthar hī kaTe

shaam hotī to kahīñ lauT ke ghar jaate ham

manzil-e-shauq hī vīrān paḌī hai kab se

varna is raah se yuuñ ḳhāk-basar jaate ham

tujh se sāvan kī ghaTā.eñ to nahīñ māñgī thiiñ

itne pyāse the ki ik buuñd se bhar jaate ham

kaisā kaisā na zamāne ne tarāshā ham ko

saḳht patthar bhī jo hote to sañvar jaate ham

dukh ke sahrāoñ meñ chīḳhoñ ne qadam rok liye

varna āñkhoñ ke samundar meñ utar jaate ham

zard chehre pe thā guzrī huī ḳhushiyoñ kā ġhubār

pyaar kī buuñd bhī paḌtī to nikhar jaate ham

na bulāte hameñ mahfil to sajā.ī hotī

lauh-e-ehsās pe dukh ban ke ubhar jaate ham

baat itni bhi na thi ji se guzar jate hum

ek nigah-e-ghalat-andaz se mar jate hum

ab to yun lagta hai bas gham ne jakaD rakkha hai

gham na hote to bhala kab ke bikhar jate hum

dopahar bhi na Dhali aur na patthar hi kaTe

sham hoti to kahin lauT ke ghar jate hum

manzil-e-shauq hi viran paDi hai kab se

warna is rah se yun KHak-basar jate hum

tujh se sawan ki ghaTaen to nahin mangi thin

itne pyase the ki ek bund se bhar jate hum

kaisa kaisa na zamane ne tarasha hum ko

saKHt patthar bhi jo hote to sanwar jate hum

dukh ke sahraon mein chiKHon ne qadam rok liye

warna aankhon ke samundar mein utar jate hum

zard chehre pe tha guzri hui KHushiyon ka ghubar

pyar ki bund bhi paDti to nikhar jate hum

na bulate hamein mahfil to sajai hoti

lauh-e-ehsas pe dukh ban ke ubhar jate hum