baat kab qissa-e-furqat mein zarurat ki thi

baat kab qissa-e-furqat meñ zarūrat kī thī

baat chāhat kī masāfat meñ madārat kī thī

tū ne ḳhud hī to mujhe jaan kahā thā varna

maiñ ne kab tujh se mohabbat kī samājat kī thī

maiñ ne dekhā thā tire husn kī shādābī ko

bas usī din se mohabbat kī sharārat kī thī

ab sharābor pasīne meñ hī guzregī hayāt

maiñ ne sāvan ke mahīne meñ mohabbat kī thī

maiñ ne palkoñ se sañvāre the tire bikhre nuqūsh

tū ne kyā soch ke phir mujh se adāvat kī thī

terī tasvīr tasavvur kī rehl meñ rakh kar

maiñ ne aksar tire chehre kī tilāvat kī thī

merī maano to mohabbat se chhuḌā lo dāman

phir na kahnā ki baḌī maiñ ne himāqat kī thī

baat kab qissa-e-furqat mein zarurat ki thi

baat chahat ki masafat mein madarat ki thi

tu ne KHud hi to mujhe jaan kaha tha warna

main ne kab tujh se mohabbat ki samajat ki thi

main ne dekha tha tere husn ki shadabi ko

bas usi din se mohabbat ki shararat ki thi

ab sharabor pasine mein hi guzregi hayat

main ne sawan ke mahine mein mohabbat ki thi

main ne palkon se sanware the tere bikhre nuqush

tu ne kya soch ke phir mujh se adawat ki thi

teri taswir tasawwur ki rehl mein rakh kar

main ne aksar tere chehre ki tilawat ki thi

meri mano to mohabbat se chhuDa lo daman

phir na kahna ki baDi main ne himaqat ki thi