baat kuchh hai bayan mein kuchh hai

baat kuchh hai bayān meñ kuchh hai

zehn meñ kuchh zabān meñ kuchh hai

dil machaltā hai āzmā.ish ko

shāyad us kī kamān meñ kuchh hai

husn-e-mahbūb kyā bayāñ kiije

aan meñ kuchh hai aan meñ kuchh hai

ham ne dil tum ko de diyā jānāñ

kyā tumhāre bhī dhyān meñ kuchh hai

kyoñ vo karne lage hayā ham se

umr kī is uThān meñ kuchh hai

aap bechain haiñ hamārī tarah

pyaar sā darmiyān meñ kuchh hai

dhaar rakhtā hai phir vo ḳhanjar par

fitna us ke dhiyān meñ kuchh hai

bevafā par na jaan de 'zākir'

jaan hī se jahān meñ kuchh hai

baat kuchh hai bayan mein kuchh hai

zehn mein kuchh zaban mein kuchh hai

dil machalta hai aazmaish ko

shayad us ki kaman mein kuchh hai

husn-e-mahbub kya bayan kije

aan mein kuchh hai aan mein kuchh hai

hum ne dil tum ko de diya jaanan

kya tumhaare bhi dhyan mein kuchh hai

kyon wo karne lage haya hum se

umr ki is uThan mein kuchh hai

aap bechain hain hamari tarah

pyar sa darmiyan mein kuchh hai

dhaar rakhta hai phir wo KHanjar par

fitna us ke dhiyan mein kuchh hai

bewafa par na jaan de 'zakir'

jaan hi se jahan mein kuchh hai