baat mein baat paida kar dena

baat meñ baat paidā kar denā

ai ḳhudā mujh ko ye hunar denā

ek merā nahīñ zamāne meñ

kāsa-e-rizq sab kā bhar denā

har taraf tū hī tū nazar aa.e

ai ḳhudā mujh ko vo nazar denā

dushmanoñ ke diloñ ko mom kareñ

merī bātoñ meñ vo asar denā

jo haiñ majbūr un ko ai maulā

sāhab-e-eqtidār kar denā

hausla azm aur sabr-o-razā

dāman-e-zindagī meñ bhar denā

ye duā hai ki ai ḳhudā-e-rahīm

purkashish merī zaat kar denā

dil karegā ġhamoñ se samjhauta

mujh ko 'maqsūd' ye ḳhabar denā

baat mein baat paida kar dena

ai KHuda mujh ko ye hunar dena

ek mera nahin zamane mein

kasa-e-rizq sab ka bhar dena

har taraf tu hi tu nazar aae

ai KHuda mujh ko wo nazar dena

dushmanon ke dilon ko mom karen

meri baaton mein wo asar dena

jo hain majbur un ko ai maula

sahab-e-eqtidar kar dena

hausla azm aur sabr-o-raza

daman-e-zindagi mein bhar dena

ye dua hai ki ai KHuda-e-rahim

purkashish meri zat kar dena

dil karega ghamon se samjhauta

mujh ko 'maqsud' ye KHabar dena