baat saqi ki na Tali jaegi

baat saaqī kī na Taalī jā.egī

ye ġhazal sāñche meñ Dhālī jā.egī

kar ke tauba aa.e dil ko jab qarār

muhr-e-shīsha toḌ Daalī jā.egī

jab naqāb-e-ruḳh haTā lī jā.egī

sub.h hogī raat kaalī jā.egī

kahkashāñ hai rif.atoñ meñ vāzhgūñ

us taraf kyoñ tab.a-e-ālī jā.egī

paan khāte haiñ to vo karte haiñ qatl

kab bhalā hoñToñ se laalī jā.egī

bāġhbāñ āmāda-e-paikār hai

ye sabad gulchīñ kī ḳhālī jā.egī

dastak-e-nāmūs kā hai ye shu.ūr

dar pe dilbar ke na Taalī jā.egī

mehmāñ ālī-tabī.at hai bahut

ḳhvān meñ sone kī thālī jā.egī

ġham na kar 'nasrīñ' tirī kashtī zarūr

shoḳh maujoñ se nikālī jā.egī

baat saqi ki na Tali jaegi

ye ghazal sanche mein Dhaali jaegi

kar ke tauba aae dil ko jab qarar

muhr-e-shisha toD Dali jaegi

jab naqab-e-ruKH haTa li jaegi

subh hogi raat kali jaegi

kahkashan hai rifaton mein wazhgun

us taraf kyon taba-e-ali jaegi

pan khate hain to wo karte hain qatl

kab bhala honTon se lali jaegi

baghban aamada-e-paikar hai

ye sabad gulchin ki KHali jaegi

dastak-e-namus ka hai ye shuur

dar pe dilbar ke na Tali jaegi

mehman aali-tabiat hai bahut

KHwan mein sone ki thaali jaegi

gham na kar 'nasrin' teri kashti zarur

shoKH maujon se nikali jaegi