baaton ko meri chhoDiye jo aapko jachi nahin

bātoñ ko merī chhoḌiye jo aap ko jachī nahīñ

lekin ye dil se pūchhiye kyā dil bhī qīmtī nahīñ

aadat burī to jā.egī ik din to jā.egī nahīñ

vo aadmī burā nahīñ fitrat agar burī nahīñ

gulshan ke phuul phuul meñ kis kī mahak hai ye batā

nazroñ se tū chhupā magar ḳhushbū terī chhupī nahīñ

tū ne nazar jo pher lī saaqī ye terā zarf hai

lekin ḳhudā kā shukr hai sāġhar mirā tahī nahīñ

kis ne uḌaa.ī baat vo kyūñkar uḌaa.ī sochiye

jo baat mere aap ke vahm-o-gumāñ meñ thī nahīñ

socho marīz-e-ishq kā us vaqt haal kyā huā

jab chārāgar ne ye kahā ummīd-e-zindagī nahīñ

tārīḳh kā varaq varaq shāhid hai is usuul kā

jab tak na jaage aadmī qismat bhī jāgtī nahīñ

chalne diyā na do qadam manzil qarīb aa ga.ī

baḳht-e-rasā kī baat hai 'muḳhlis' hañsī huī nahīñ

baaton ko meri chhoDiye jo aap ko jachi nahin

lekin ye dil se puchhiye kya dil bhi qimti nahin

aadat buri to jaegi ek din to jaegi nahin

wo aadmi bura nahin fitrat agar buri nahin

gulshan ke phul phul mein kis ki mahak hai ye bata

nazron se tu chhupa magar KHushbu teri chhupi nahin

tu ne nazar jo pher li saqi ye tera zarf hai

lekin KHuda ka shukr hai saghar mera tahi nahin

kis ne uDai baat wo kyunkar uDai sochiye

jo baat mere aap ke wahm-o-guman mein thi nahin

socho mariz-e-ishq ka us waqt haal kya hua

jab chaaragar ne ye kaha ummid-e-zindagi nahin

tariKH ka waraq waraq shahid hai is usul ka

jab tak na jage aadmi qismat bhi jagti nahin

chalne diya na do qadam manzil qarib aa gai

baKHt-e-rasa ki baat hai 'muKHlis' hansi hui nahin