baz dil yaad se unki na zara-bhar aaya

baaz dil yaad se un kī na zarā-bhar aayā

vo na aayā to ḳhayāl un kā barābar aayā

sāqiyā dard-bharā hī rahā paimāna-e-chashm

so tirī baat pe chhalkā jo zarā-bhar aayā

aah vo shiddat-e-ġham hai ki mirī āñkhoñ se

būñd-do-būñd nahīñ ek samundar aayā

jis se bachne ke liye band kiiñ āñkheñ ham ne

band āñkhoñ pe bhī aage vahī manzar aayā

ye jo sahrā meñ phirā kartā hai dīvāna sā

ḳhud ko duniyā ke jhameloñ se chhuḌā kar aayā

dil ko shiddat se tamannā thī tire kūche kī

so baḌe shauq se us ko maiñ vahāñ dhar aayā

baz dil yaad se un ki na zara-bhar aaya

wo na aaya to KHayal un ka barabar aaya

saqiya dard-bhara hi raha paimana-e-chashm

so teri baat pe chhalka jo zara-bhar aaya

aah wo shiddat-e-gham hai ki meri aankhon se

bund-do-bund nahin ek samundar aaya

jis se bachne ke liye band kin aankhen hum ne

band aankhon pe bhi aage wahi manzar aaya

ye jo sahra mein phira karta hai diwana sa

KHud ko duniya ke jhamelon se chhuDa kar aaya

dil ko shiddat se tamanna thi tere kuche ki

so baDe shauq se us ko main wahan dhar aaya