bazar-e-dahr mein teri manzil kahan na thi

bāzār-e-dahr meñ tirī manzil kahāñ na thī

yūsuf na jis meñ ho koī aisī dukāñ na thī

zardī ne mere rañg kī mujh ko rulā diyā

hañsvā.e jo kisī ko ye vo zāfarāñ na thī

zāhir se ḳhūb-rūyoñ kā bātin ḳhilāf thā

shīrīñ-laboñ kī tarah se un kī zabāñ na thī

manzil hī duur hai jo ye pahuñchī nahīñ hanūz

dam lene vaalī raah meñ umr-e-ravāñ na thī

dikhlā.ī sair āñkhoñ ko bām-e-murād kī

aisī koī kamand koī nardbāñ na thī

qaus-e-quzah se ham ne bhī tashbīh dī use

chilla na hone se jo vo abrū kamāñ na thī

āgāh jazb-e-ishq-e-zuleḳhā se thā na husn

yūsuf ko chaah meñ ḳhabar-e-kārvāñ na thī

yaad aa ga.ī jo silk-e-guhar tere gosh kī

sūhān-e-rūh thī mujhe shab kahkashāñ na thī

rah jaanā pīchhe jism kā jaañ se ajab nahīñ

kis kārvāñ kī gard pas-e-kārvāñ na thī

nā-fahmī kī dalīl hai ye sajda se aayā

iblīs ko haqīqat-e-ādam ayaañ na thī

āshiq ke sar ke saath hai saudā-e-kū-e-yār

momin na thā vo jis ko havā-e-jināñ na thī

bāñg-e-jaras se aage har ik kā qadam rahā

gard apne kārvāñ ke pas-e-kārvāñ na thī

afsos kyā javānī-e-rafta kā kījiye

vo kaun sī bahār thī jis ko ḳhizāñ na thī

nāloñ se ek din na kiye garm gosh-e-yār

'ātish' magar tumhāre dahan meñ zabāñ na thī

bazar-e-dahr mein teri manzil kahan na thi

yusuf na jis mein ho koi aisi dukan na thi

zardi ne mere rang ki mujh ko rula diya

hanswae jo kisi ko ye wo zafaran na thi

zahir se KHub-ruyon ka baatin KHilaf tha

shirin-labon ki tarah se un ki zaban na thi

manzil hi dur hai jo ye pahunchi nahin hanuz

dam lene wali rah mein umr-e-rawan na thi

dikhlai sair aankhon ko baam-e-murad ki

aisi koi kamand koi nardban na thi

qaus-e-quzah se hum ne bhi tashbih di use

chilla na hone se jo wo abru kaman na thi

aagah jazb-e-ishq-e-zuleKHa se tha na husn

yusuf ko chah mein KHabar-e-karwan na thi

yaad aa gai jo silk-e-guhar tere gosh ki

suhan-e-ruh thi mujhe shab kahkashan na thi

rah jaana pichhe jism ka jaan se ajab nahin

kis karwan ki gard pas-e-karwan na thi

na-fahmi ki dalil hai ye sajda se aaya

iblis ko haqiqat-e-adam ayan na thi

aashiq ke sar ke sath hai sauda-e-ku-e-yar

momin na tha wo jis ko hawa-e-jinan na thi

bang-e-jaras se aage har ek ka qadam raha

gard apne karwan ke pas-e-karwan na thi

afsos kya jawani-e-rafta ka kijiye

wo kaun si bahaar thi jis ko KHizan na thi

nalon se ek din na kiye garm gosh-e-yar

'atish' magar tumhaare dahan mein zaban na thi