babul kar diya badan jawan ruton ki chah ne

babūl kar diyā badan javāñ rutoñ kī chaah ne

jalā diyā gulāb ko chaman kī sard aah ne

sitam-zarīf yuuñ adālatoñ meñ chup khaḌe haiñ sab

ki jaise sī liye hoñ lab subūt ne gavāh ne

kisī ko ḳhaas manziloñ kā shauq aam kar gayā

kisī ko ḳhaas kar diyā hai aam shāhrāh ne

nigāh-e-be-zabān ne girā diyā zamīn par

chaḌhā diyā hai daar par zabān-e-be-nigāh ne

vahī nagīne pattharoñ ke daam bik rahe haiñ ab

kabhī jo taaj meñ lagā rakhe the tere shaah ne

maiñ āḳhirī ġhazal sunā ke uTh rahā thā bazm se

ki muuD phir banā diyā kisī kī vaah vaah ne

babul kar diya badan jawan ruton ki chah ne

jala diya gulab ko chaman ki sard aah ne

sitam-zarif yun adalaton mein chup khaDe hain sab

ki jaise si liye hon lab subut ne gawah ne

kisi ko KHas manzilon ka shauq aam kar gaya

kisi ko KHas kar diya hai aam shahrah ne

nigah-e-be-zaban ne gira diya zamin par

chaDha diya hai dar par zaban-e-be-nigah ne

wahi nagine pattharon ke dam bik rahe hain ab

kabhi jo taj mein laga rakhe the tere shah ne

main aaKHiri ghazal suna ke uTh raha tha bazm se

ki muD phir bana diya kisi ki wah wah ne