bacha le dhup se aisa koi shajar na mila

bachā le dhuup se aisā koī shajar na milā

kahīñ surāġh-e-vafā qissa muḳhtasar na milā

machal rahe the jabīn-e-niyāz meñ sajde

ye aur baat muqaddar se sañg-e-dar na milā

kuredte rahe sab dost mere zaḳhmoñ ko

sabhī ne tanz kiye koī chārāgar na milā

vo karbalā to nahīñ dostoñ kī bastī thī

taḌapte rah ga.e paanī ko buuñd bhar na milā

hujūm yāroñ kā thā mere saath sāhil tak

samundaroñ meñ magar koī ham-safar na milā

likhā ke laa.e the mahrūmiyāñ muqaddar meñ

tujhe duā na milī aur mujhe asar na milā

abhī to ashk kī ik buuñd se ye tūfāñ hai

qadam sambhāl le aur aah meñ sharar na milā

qadam baḌhā.e to pāyāb thā har ik dariyā

magar talāsh thī jis kī vahī guhar na milā

ham apnī ziist ko karte bhī kyā raqam 'az.har'

varaq milā bhī jo sīmīñ to āb-e-zar na milā

bacha le dhup se aisa koi shajar na mila

kahin suragh-e-wafa qissa muKHtasar na mila

machal rahe the jabin-e-niyaz mein sajde

ye aur baat muqaddar se sang-e-dar na mila

kuredte rahe sab dost mere zaKHmon ko

sabhi ne tanz kiye koi chaaragar na mila

wo karbala to nahin doston ki basti thi

taDapte rah gae pani ko bund bhar na mila

hujum yaron ka tha mere sath sahil tak

samundaron mein magar koi ham-safar na mila

likha ke lae the mahrumiyan muqaddar mein

tujhe dua na mili aur mujhe asar na mila

abhi to ashk ki ek bund se ye tufan hai

qadam sambhaal le aur aah mein sharar na mila

qadam baDhae to payab tha har ek dariya

magar talash thi jis ki wahi guhar na mila

hum apni zist ko karte bhi kya raqam 'azhar'

waraq mila bhi jo simin to aab-e-zar na mila