bad amal karte ho aur nek jaza chahte ho

bad amal karte ho aur nek jazā chāhte ho

dil meñ socho to ki kyā karte ho kyā chāhte ho

us ke bandoñ kā satānā hai nihāyat hī burā

un ko ārām do gar apnā bhalā chāhte ho

nā-ḳhudā-tarshoñ ko jab tum ne kiyā apnā nadīm

huā ma.alūm ki tum apnā burā chāhte ho

bad-ma.āshoñ se to karvāte ho aalam ko tabāh

us pe ye lutf hai ābād huā chāhte ho

hājateñ aur ġharīboñ kī to karvāte ho band

aur hājāt ko tum apnī ravā chāhte ho

saare aalam ko to rulvāte ho aur is ke evaz

ye tamāshā hai ki tum aap hañsā chāhte ho

baat kyūñ-kar bane zāhir meñ to farmāte ho lutf

qatl bātin meñ ġharīboñ ko kiyā chāhte ho

'aish' kar arz yahī un se ki bas tauba karo

maraz-e-ġham se agar apnī shifā chāhte ho

bad amal karte ho aur nek jaza chahte ho

dil mein socho to ki kya karte ho kya chahte ho

us ke bandon ka satana hai nihayat hi bura

un ko aaram do gar apna bhala chahte ho

na-KHuda-tarshon ko jab tum ne kiya apna nadim

hua malum ki tum apna bura chahte ho

bad-maashon se to karwate ho aalam ko tabah

us pe ye lutf hai aabaad hua chahte ho

hajaten aur gharibon ki to karwate ho band

aur hajat ko tum apni rawa chahte ho

sare aalam ko to rulwate ho aur is ke ewaz

ye tamasha hai ki tum aap hansa chahte ho

baat kyun-kar bane zahir mein to farmate ho lutf

qatl baatin mein gharibon ko kiya chahte ho

'aish' kar arz yahi un se ki bas tauba karo

maraz-e-gham se agar apni shifa chahte ho