bad-nasib banjara us zamin ka basi hai

bad-nasīb banjāra us zamīñ kā baasī hai

jo zamīn ulfat kī muddatoñ se pyāsī hai

har taraf añdherā hai har taraf udāsī hai

shahr-e-pur-ziyā meñ bhī raushnī zarā sī hai

jo sadā.eñ detā hai kūcha-e-nigārāñ meñ

ajnabī nahīñ koī shakl āshnā sī hai

kyā ḳhizāñ kā phir mausam aa gayā gulistāñ meñ

kyoñ guloñ ke chehroñ par itnī bad-havāsī hai

dekhiye ḳhudā jaane kis tarah guzartī hai

baat yuuñ to kahne ko kuchh nahīñ zarā sī hai

sādgī kā partav hai merā har lab-o-lahja

aap kaise kahte haiñ ye ġhazal siyāsī hai

saaf kartī rahtī hai sūkhe ḳhār-o-gul aksar

dosto nasīm-e-sub.h mausamoñ kī daasī hai

zāviye nigāhoñ ke merī samt haiñ 'hairat'

ḳhāmushī meñ poshīda un kī ik hayā sī hai

bad-nasib banjara us zamin ka basi hai

jo zamin ulfat ki muddaton se pyasi hai

har taraf andhera hai har taraf udasi hai

shahr-e-pur-ziya mein bhi raushni zara si hai

jo sadaen deta hai kucha-e-nigaran mein

ajnabi nahin koi shakl aashna si hai

kya KHizan ka phir mausam aa gaya gulistan mein

kyon gulon ke chehron par itni bad-hawasi hai

dekhiye KHuda jaane kis tarah guzarti hai

baat yun to kahne ko kuchh nahin zara si hai

sadgi ka partaw hai mera har lab-o-lahja

aap kaise kahte hain ye ghazal siyasi hai

saf karti rahti hai sukhe KHar-o-gul aksar

dosto nasim-e-subh mausamon ki dasi hai

zawiye nigahon ke meri samt hain 'hairat'

KHamushi mein poshida un ki ek haya si hai