bad-qismati pe zor mera chal nahin raha

bad-qismatī pe zor mirā chal nahīñ rahā

ye hādisa kisī bhī tarah Tal nahīñ rahā

aaseb ke vo saa.e musallat haiñ in dinoñ

āñkhoñ meñ ek ḳhvāb talak pal nahīñ rahā

jān-e-bahār ab ye takalluf bhī chhoḌ de

jab maiñ tirī nigāh meñ avval nahīñ rahā

kyā ḳhuub mo'jiza hai ki sho'la-badan ke maiñ

pahlū meñ aa gayā huuñ magar jal nahīñ rahā

is mas.ale kā hal to faqat aap the huzūr

ab aap kah rahe haiñ koī hal nahīñ rahā

she'r-o-suḳhan bhī band hai pichhle baras se aur

is dil kā kārobār bhī ab chal nahīñ rahā

'hamza-bilāl’ saḳht hai aisā balā kā saḳht

sab kuchh gañvā ke haath talak mal nahīñ rahā

bad-qismati pe zor mera chal nahin raha

ye hadisa kisi bhi tarah Tal nahin raha

aaseb ke wo sae musallat hain in dinon

aankhon mein ek KHwab talak pal nahin raha

jaan-e-bahaar ab ye takalluf bhi chhoD de

jab main teri nigah mein awwal nahin raha

kya KHub mo'jiza hai ki sho'la-badan ke main

pahlu mein aa gaya hun magar jal nahin raha

is masale ka hal to faqat aap the huzur

ab aap kah rahe hain koi hal nahin raha

she'r-o-suKHan bhi band hai pichhle baras se aur

is dil ka karobar bhi ab chal nahin raha

'hamza-bilal’ saKHt hai aisa bala ka saKHt

sab kuchh ganwa ke hath talak mal nahin raha