badal jaega sab kuchh ye tamasha bhi nahin hoga

badal jā.egā sab kuchh ye tamāshā bhī nahīñ hogā

nazar aa.egā vo manzar jo sochā bhī nahīñ hogā

har ik lamha kisī shai kī kamī mahsūs bhī hogī

kahīñ bhī duur tak koī ḳhalā sā bhī nahīñ hogā

vo āñkheñ bhī nahīñ hoñgī kaheñ jo an-kahī bāteñ

havā meñ sabz āñchal kā vo lahrā bhī nahīñ hogā

simaT jā.egī duniyā sā.at-e-imroz meñ ik din

shumār-e-zīst meñ dīroz o fardā bhī nahīñ hogā

magar qad roz o shab kā dekh kar hairān sab hoñge

madār apnā zamīñ ne garche badlā bhī nahīñ hogā

ajab vīrāniyāñ ābād hoñgī qarya-dar-qarya

shajar shāḳhoñ pe chiḌiyoñ kā baserā bhī nahīñ hogā

badal jaega sab kuchh ye tamasha bhi nahin hoga

nazar aaega wo manzar jo socha bhi nahin hoga

har ek lamha kisi shai ki kami mahsus bhi hogi

kahin bhi dur tak koi KHala sa bhi nahin hoga

wo aankhen bhi nahin hongi kahen jo an-kahi baaten

hawa mein sabz aanchal ka wo lahra bhi nahin hoga

simaT jaegi duniya saat-e-imroz mein ek din

shumar-e-zist mein diroz o farda bhi nahin hoga

magar qad roz o shab ka dekh kar hairan sab honge

madar apna zamin ne garche badla bhi nahin hoga

ajab viraniyan aabaad hongi qarya-dar-qarya

shajar shaKHon pe chiDiyon ka basera bhi nahin hoga