badan-e-yar ki bu-bas uDa lae hawa

badan-e-yār kī bū-bās uḌā laa.e havā

jaan aa jaa.e jo vaañ ho ke yahāñ aa.e havā

badan-e-yār ko bas chhū ke na itrā.e havā

itr kī ban ke lapaT mujh se lipaT jaa.e havā

un ke kūche meñ ġhubār apnā uḌā kar le jaa.e

mujh pe ehsān kare mere bhī kaam aa.e havā

bañdh ga.ī baaġh meñ terī to havā bād-e-sabā

un ke kūche meñ mirī aah kī bañdh jaa.e havā

kyuuñ na ho bād-e-bahārī mujhe ye farmā.ish

kyuuñ na bāñdhūñ maiñ havā yaar jo bañdhvā.e havā

tū mile 'mehr' se ai mah yahī tārīḳh ho sach

gulshan-o-bāda-o-gul meñ tujhe garmā.e havā

badan-e-yar ki bu-bas uDa lae hawa

jaan aa jae jo wan ho ke yahan aae hawa

badan-e-yar ko bas chhu ke na itrae hawa

itr ki ban ke lapaT mujh se lipaT jae hawa

un ke kuche mein ghubar apna uDa kar le jae

mujh pe ehsan kare mere bhi kaam aae hawa

bandh gai bagh mein teri to hawa baad-e-saba

un ke kuche mein meri aah ki bandh jae hawa

kyun na ho baad-e-bahaari mujhe ye farmaish

kyun na bandhun main hawa yar jo bandhwae hawa

tu mile 'mehr' se ai mah yahi tariKH ho sach

gulshan-o-baada-o-gul mein tujhe garmae hawa