badan ke dasht mein kuchh dard ke aahu nikalte hain

badan ke dasht meñ kuchh dard ke aahū nikalte haiñ

mirī ġhazloñ meñ is ḳhātir na.e pahlū nikalte haiñ

maiñ hairāñ huuñ ki mujh ko tum milī ho kin savāboñ se

gunahgāroñ kī qabroñ meñ to bas bichchhū nikalte haiñ

bahut lāchār hote haiñ dayār-e-'ishq meñ vo bhī

jo duniyāvī ravābit meñ baḌe baabū nikalte haiñ

nazar paḌtī hai jab merī tirī chhoḌī nishānī par

mirī āñkhoñ se aañsū ho ke be-qābū nikalte haiñ

mirā dil hai purāne daur kī tīra-shabī kā ghar

tirī yādoñ ke chamgādaḌ yahāñ har-sū nikalte haiñ

hamī ko dekh kar āñkhoñ se vo parda uThātā hai

hamāre qatl ko har samt se chāqū nikalte haiñ

badan ke dasht mein kuchh dard ke aahu nikalte hain

meri ghazlon mein is KHatir nae pahlu nikalte hain

main hairan hun ki mujh ko tum mili ho kin sawabon se

gunahgaron ki qabron mein to bas bichchhu nikalte hain

bahut lachaar hote hain dayar-e-'ishq mein wo bhi

jo duniyawi rawabit mein baDe babu nikalte hain

nazar paDti hai jab meri teri chhoDi nishani par

meri aankhon se aansu ho ke be-qabu nikalte hain

mera dil hai purane daur ki tira-shabi ka ghar

teri yaadon ke chamgadaD yahan har-su nikalte hain

hami ko dekh kar aankhon se wo parda uThata hai

hamare qatl ko har samt se chaqu nikalte hain