badan ke sath hi aashob-e-jaan uThae hue

badan ke saath hī āshob-e-jāñ uThā.e hue

chalo kuchh aur ye bār-e-garāñ uThā.e hue

hamāre jaise to do chaar das hī hoñge yahāñ

zamīñ pe phirte haiñ jo āsmāñ uThā.e hue

baḌhā dī maut ne kuchh aur bhī mirī takrīm

haiñ hāthoñ haath mujhe mehrbāñ uThā.e hue

hasīn ban ke guzārī hai zindagī maiñ ne

tamām yaar rahe barchhiyāñ uThā.e hue

'ajīb ḳhvāb ye dekhā guzishta shab maiñ ne

khaḌe haiñ log mujhe darmiyāñ uThā.e hue

maiñ us ke sāmne kab tak rahūñgā sīna-sipar

vo mujh ko dekh rahā hai kamāñ uThā.e hue

tamām sahrā hī gulshan dikhā.ī detā hai

hai tere pairoñ ke jab se nishāñ uThā.e hue

tamām raat kī rūdād kah rahī hai 'nūr'

ye bujhtī sham' laboñ par dhuāñ uThā.e hue

badan ke sath hi aashob-e-jaan uThae hue

chalo kuchh aur ye bar-e-garan uThae hue

hamare jaise to do chaar das hi honge yahan

zamin pe phirte hain jo aasman uThae hue

baDha di maut ne kuchh aur bhi meri takrim

hain hathon hath mujhe mehrban uThae hue

hasin ban ke guzari hai zindagi main ne

tamam yar rahe barchhiyan uThae hue

'ajib KHwab ye dekha guzishta shab main ne

khaDe hain log mujhe darmiyan uThae hue

main us ke samne kab tak rahunga sina-sipar

wo mujh ko dekh raha hai kaman uThae hue

tamam sahra hi gulshan dikhai deta hai

hai tere pairon ke jab se nishan uThae hue

tamam raat ki rudad kah rahi hai 'nur'

ye bujhti sham' labon par dhuan uThae hue