badan ki aanch se chehra nikhar gaya kaisa

badan kī aañch se chehra nikhar gayā kaisā

ye merī ruuh meñ sho.ala utar gayā kaisā

hazār āñkhoñ se maiñ us kā muntazir aur vo

mire qarīb se ho kar guzar gayā kaisā

ye kis havā kī anā toḌtī rahī ham ko

hamāre ḳhvāboñ kī ḳhirman bikhar gayā kaisā

dikhā ke ek jhalak chāñd ho gayā ojhal

chaḌhā na thā ki ye dariyā utar gayā kaisā

kis āftāb se tarsīl-e-nūr jaarī hai

dhanak kā rañg zamīñ par bikhar gayā kaisā

na apne qad kā na apne hajm kā hai ehsās

ḳhalā kā dasht subuk-bār kar gayā kaisā

kisī gumān ke sahrā meñ kaisī ḳhaak uḌī

kisī yaqīn kā partav ubhar gayā kaisā

vo tīra-chashm ki sūraj se bad-gumān rahā

ḳhud apne saa.e kī aahaT se Dar gayā kaisā

badan ki aanch se chehra nikhar gaya kaisa

ye meri ruh mein shoala utar gaya kaisa

hazar aankhon se main us ka muntazir aur wo

mere qarib se ho kar guzar gaya kaisa

ye kis hawa ki ana toDti rahi hum ko

hamare KHwabon ki KHirman bikhar gaya kaisa

dikha ke ek jhalak chand ho gaya ojhal

chaDha na tha ki ye dariya utar gaya kaisa

kis aaftab se tarsil-e-nur jari hai

dhanak ka rang zamin par bikhar gaya kaisa

na apne qad ka na apne hajm ka hai ehsas

KHala ka dasht subuk-bar kar gaya kaisa

kisi guman ke sahra mein kaisi KHak uDi

kisi yaqin ka partaw ubhar gaya kaisa

wo tira-chashm ki suraj se bad-guman raha

KHud apne sae ki aahaT se Dar gaya kaisa