badan ki sarhad pe barishon ki jhaDi lagi hai ajab ghaDi hai

badan kī sarhad pe bārishoñ kī jhaḌī lagī hai 'ajab ghaḌī hai

tilism TuuTā fasīl-e-imkān gir paḌī hai 'ajab ghaḌī hai

ġhadar paḌā hai guzartī sā'at hazār yādeñ udheḌtī hai

maiñ kyā batā.ūñ yahāñ to dillī ujaḌ chukī hai 'ajab ghaḌī hai

zamīñ pe robot apne aañsū kā zā.iqa tak batā rahe haiñ

machine-zādoñ pe kyā karāmat utar rahī hai 'ajab ghaḌī hai

koī javāñ phir jalā rahā hai ḳhudā.ī ātish-kade se mash'al

zamīñ kī harakat se āsmānoñ meñ khalbalī hai 'ajab ghaḌī hai

jahān-e-hairat-sarā meñ mohlat kahāñ kisī ko nasīb hove

ajal-girafta hayāt sar pe khaḌī huī hai 'ajab ghaḌī hai

vujūd apnī shikastagī ko fanā kī chakkī meñ pīstā hai

'adam-navardoñ ne maut kī simfanī sunī hai 'ajab ghaḌī hai

fanā ke andhe kueñ meñ koī tilism aisā bhī jalva-gar hai

ki zindagī kī parī bhī us meñ utar rahī hai 'ajab ghaḌī hai

rivāq-e-basra kī sham.a-e-īmāñ se bāġh-e-jannat sulag uThā hai

yaqīñ kī bārish ne aag dozaḳh kī sard kī hai 'ajab ghaḌī hai

tamāsh-bīno sarāb-e-hastī ko chashm-e-hairat meñ tolte ho

mujhe batāo ye zindagī hai ki phuljhaḌī hai 'ajab ghaḌī hai

badan ki sarhad pe barishon ki jhaDi lagi hai 'ajab ghaDi hai

tilism TuTa fasil-e-imkan gir paDi hai 'ajab ghaDi hai

ghadar paDa hai guzarti sa'at hazar yaaden udheDti hai

main kya bataun yahan to dilli ujaD chuki hai 'ajab ghaDi hai

zamin pe robot apne aansu ka zaiqa tak bata rahe hain

machine-zadon pe kya karamat utar rahi hai 'ajab ghaDi hai

koi jawan phir jala raha hai KHudai aatish-kade se mash'al

zamin ki harakat se aasmanon mein khalbali hai 'ajab ghaDi hai

jahan-e-hairat-sara mein mohlat kahan kisi ko nasib howe

ajal-girafta hayat sar pe khaDi hui hai 'ajab ghaDi hai

wujud apni shikastagi ko fana ki chakki mein pista hai

'adam-nawardon ne maut ki simfani suni hai 'ajab ghaDi hai

fana ke andhe kuen mein koi tilism aisa bhi jalwa-gar hai

ki zindagi ki pari bhi us mein utar rahi hai 'ajab ghaDi hai

riwaq-e-basra ki shama-e-iman se bagh-e-jannat sulag uTha hai

yaqin ki barish ne aag dozaKH ki sard ki hai 'ajab ghaDi hai

tamash-bino sarab-e-hasti ko chashm-e-hairat mein tolte ho

mujhe batao ye zindagi hai ki phuljhaDi hai 'ajab ghaDi hai